Teil 1: Gstrandet uf enere Insle
Uf enere einsame Insle gstrandet. Amene Dunschtig Morge, uf enere unbewohnte Insle im Pazifik isch da es Frachtschiff gstrandet.
De Hund am Strand. dBesatzig isch glücklicher Wiis grettet worde. Nur en chliine Hund, dä händs überseeh und jetzt isch er ganz alleini am Strand.
dBekanntschaft mit em Tiger. Er hät Hunger und suecht nach Essbarem, da gseht er vo wiitem es anders Weese. So öppis het er no nie gseh, wie ne Chatz aber viel, biel grösser. Isch das echt en Tiger, sait er luut vor sich here.
De König vom Dschungel. «Genau, ich bin de König Dschungel und das isch doch Dschungel. Also dänn, schlüss Dich mir aa. Ich weiss wo s duregaaht». Seit de Tiger, nöd ganz bescheide. Da chunnts em Hund wieder in Sinn. Er het de Tiger scho mal gseh. Do isch er imene Chäfig gsiih, of dem grosse Boot. «Nei, ich warte lieber. Mis Herrli chunnt mi sicher glii go hole.»
En einsami Hütte. De Tiger lacht:«Meinsch segsch der einzig Hund? Dis Herrli het gschiiders ztue». De Hund het aber gar nöd zfriede driigluegt. «Also guet», seid de Tiger, «mir chönd ja de Strand uuskundschafte, dänn gseh mer dis Herrli wänns chund.»
dRatte. Die Hütte isch von nöchem gar nöd so schlecht gsii wies uf der ersti Blick uusgseh het. Es hät es Dach wo dicht isch, es hät en Tisch, es Bett und e Chuchi, sogar e chlii Späck und Chäs im Spüeltroog. «Wagets nöd öppis devo z ässe!» Seit es piipsigs Stimmli. E chliini graui Ratte luegt sie usefordernd ah.
Der Uuriiwohner. «Bisch du au vo dem Schiff?» frögt de Hund. «Das isch keis Schiff, das isch es Boot», motzt de Tiger». Abschätzig luegt de Hund de Tiger aa. Was weiss scho eine, wo useme Chäfig isch? «Nei, unterbricht dRatte de Striit. Ich bin scho sit immer da.»
Kritischi Iiwänd. «Das chan gar nöd sii», seit de Hund. «Es git gar kei Ratte of denen Pazifikinsle wo scho immer da gsii sind. Die sind alli vo Seefahrer aagschleppt worde.» De Tiger rollt nur mit de Auge und brummt: «Ignorante Besserwüsser…».
Teil 2: Lebe uf der Insle
Regle vom Zämelebe. «Söttet mir nöd es paar Regle mache?» meint de Hund und luegt ängstlich de Tiger aa. «Regle?» frögt dRatte «wieso Regle?» «Zums Esse gerecht uffteile» seit de Hund wiiter. «Und dass mer Eus nöd gägesiitig uufessed.» lachet de Tiger.dGerechtigkeit erfinde. «Dänn müend ihr mir aber au helfe», seid Ratte, «wänn ich Eu vo mim Esse abgibe.» «Ja natürli», seid de Hund, «du chasch mit mir grettet werde, wänn mis Herrli chunt… und ich verspriche, dass ich dich nöd uuffresse.» «Da chönnt ich dich ja vorher uuffresse» chnurret de Tiger und leit sich an Strand. Das wird im langsam zblööd. «Super!», seid de Hund, «du chasch uufpasse, ob mis Herrli chund. Dänn gahn i go Esse organisiere». «Es hät doch Esse», dänkt Ratte und leit sich mit em Tiger iid sunne.
Ungliichi Bedürfnis. Churz drufabe chunnt de Hund mit emene tote Huen wieder. Der Tiger wots grad abeschlinge da seit de Hund:» zerscht ich. Ich bin am wichtigste. Suscht nimmt eu min Herr nöd mit.» «Mir wänd aber gar nöd mitgno werde» meint de Tiger und luegt Ratte aa, «du häsch doch gseit, du würdsch keine vo Eus uufesse?» «Ja und?» «Aber das Huehn hesch tötet?» «Das zellt nöd, das isch ja keis Säugetier.» dRatte isch nöd überzügt, aber schwigt.
Nach emene Wiili… Hüt het der Hund s’letschte Tier vo dere Insle uufgresse. De Tiger isch scho ganz abgmageret. Da er aber grösserisch, chan er wenigschtens ab und zu en Fisch us em Meer fische. De Ratte gaht’s guet. Sie isst wiiter vo de Beeri und Chrüüter wos im Dschungel het.
Notstand. «Viellicht söttet mir dRatte fresse» flüschtered de Hund em Tiger zue. «Die git au nöd meh her als en Fisch. Usserdem hämmer abgmacht eus nöd gegesitig zfresse», de Tiger runzlet Stirn. «Ja, aber das isch doch en Notstand!» de Hund wird ganz uufgregt, «da giltetd doch dRegle nöd». «So?» De Tiger wird ganz nachdänklich und es vergaht em sogar de Appetit uf Fische.
Es Schiff chunt. I dem Moment gsehnds am Horizont es Schiff. «Min Herr chund, min Herr chund!» freut sich de Hund, «mir sind grettet». «Das isch ja no chliiner als das Boot vo dim Herr», wendet de Tiger ii. «Hesch no nie öppis vo wiiterentwicklig ghört?» Seit de Hund. «Die händ sich aber no wiiter entwickled als nur’s Boot», de Tiger schlüsst dAuge und spienzled gäg zSunne. «E so wie die het keine uf Eusem Boot uusgseh» «Ja, das isch ebe dEvolution» Seit de Hund, freudestrahlend. «Ageber», dänkt de Tiger, evoluzizon…
Nöd sgliiche Herrli. Drü Holzkanu fahret ad Insle und halbnackti Mane und Fraue stiiget us. Eini schüsst en Speer uf de Hund. «Guets Esse» seit sie und lachet ganz verliebt de Maa näbed ihre aa. De Tiger wot in Panik wegränne. Da chund en Maa mit emene Bluemechranz uf in zue und chnünled vor im ane. «Oh, Grosse König vom Dschungel!» De Tiger cha sis glück chum fasse.
Fürbitt. dRatte sitzt brüelend näbbet em verletzte Hund und leit Chrüter uf sini Wunde. «De dummi Hund. Tüent in bitte nöd esse. Er cha doch nüd defür, hät sis ganze Lebe uf emene Boot verbracht.» D’Mänsche händ verbarme und helfet de Hund gsund zpflege. Doch dRatte eheret sie als en Gott. «Du bisch wahrlich erlüchtet.» seit de Ma mit de Blueme. Mir wärdet die Insle schütze und Eu jede Tag zEsse bringe.»
En andri Version vom Paradis. Es paar Chinde bringed Chäs und Brot. Dänn verabschided sich die Mänsche und fahret mit ihrne Boot devo.
dRatte de Tiger und de Hund läbet jetzt aber in Friede uf dere Insle.
Mini drü Chind wo sZämmeläbe lerned:
- De Tiger geboreni Elia
- De Hund geboreni Vidal
- De Ratte geboreni Oscar
Theme:
- sElend vo eusere Weltordnig
sNaturrecht
De Notstand
Vergebig und Erlösig zwüsched de Mönsche(alias Inselbewohner Tiger, Hund, Ratte) und em Heilige (alias Maori)
Ökologisches Gliichgwicht
